حاجات بحبها

حاجات بحبها ..
..

حاجات بسيطة قوي بس بتسعدني قوي
مش لازم تكون كبيرة ولا صعبة ولا مكلفة
في ناس بتدور على الحاجات الكبيرة
بس أنا : حاجات صغننة قوي وبسيطة
اللى بتفرحني وترضيني وبجد تدخل البهجة لقلبي

زي مثلاً إيه ...

بحب لما أجيب هدية لحد وتكون حاجة محتاجها أو مكنش لاقيها
بفرح لما أحل مشكلة أو لما أفرح حد
بحب لما كنت بتناقش مع بابا في حاجة ويعقد يشرحلي أي حاجة
كان دايماً يقول علي البت اللمضة

بحب ليلة سهرتها مع منى بنت خالتي لغاية الصبح
لحد ما بدأ الكلام يدخل في بعضه وبدأنا نهيس بجد
وفاكرة عمر كان بيسقط خالص وبرده كان مصمم يسهر معانا
كأننا مقبوض علينا وبنتعذب واللمبة بترقص فوق رأسنا
بصراحة أنا شوية وكنت هعترف بكل حاجة .

بموت في أحمد وعمر أخواتها
وحشتوني قوي يا منى ربنا يرجعكم بالسلامة

بحب صلاة التراويح في مسجد الصديق وصلاة العيد في مسجد أبو زهرة
ونطلع نفرقع بمب زي الأطفال ،
بحب تواشيح وآذان وصلاة ووقت الفجر قوي

بحب كلمة (الصلاة خير من النوم) بتحسسني بشعور غريب

بحب الجبنة البراميلي بتاعة عيسوي وبحب النسكافيه اللى بعمله في البيت
وبمووت في الشيكولاتة وغزل البنات

بحب شط اسكندرية وبحب المحروسة قوي، بابا كمان كان بيحبها
بحب دار الضيافة بتاع الشرطة اللى في مدينة نصر
عشان بابا اللى اكتشفه بعد ما جددوه
بحب الشتاء والجري في المطرة

بموت في عمر ابن أختي وبحب الكلام مع عبد السلام
بحب أي وقت أقضيه مع نورا مع إنها اتشغلت شوية عني
بعد ما خلفت كنزي ربنا يخليهالها ويبارك فيها
بس أنا مسامحة عشان خاطر عيون كنزي
صبرك علي يا نورا لما أشوفك بس
بحب أنا ومحمد لما نستلم حاجة ونقعد نتريأ عليها

بحب الأفلام الأجنبي وبعشق الدراما السورية والأفلام القصيرة آخر حاجة
بحب فيدو ديدو وإعلاناته المطرقعة
بحب أغاني منير وبحب حاجات كتير
...