آه يا عين يا ليل

آه يا عين يا ليل

23/4/2008

.

سمعت الأغنية ده بتاعة لؤي النهارده الصبح في الراديو
يااااه رجعتني لأيام حلوة قوي, يومها خرجنا أنا وماما وزهراء
مع طنط نادية ومنى وخالد وأحمد وعمر ورحنا كارفور المعادي

اشترينا حاجات وبعد ما خلصنا قعدنا بره في الكافيه
الأغنية ده كانت شغالة في التليفزيون وكان في واحدة بترقص
عليها وهي قاعدة على الكرسي مش عارفة إزاي
بس يومها ضحكتنا قوي ..

وإحنا مروحين خالد مشانا من طريق غريب جداً
(قال هيختصر وياريته ما اختصر) كان طريق ظلمة جداً ومرعب
وفيه أصوات غريبة ولقينا إيه في الطريق مستنينا ؟؟؟؟
كنيسة قديمة قوي ومفيش لمباية منورة فيها
وحواليها شجر كتير وعيش بقى ..

وتحس إن الجنايني هيظهر بالفاس والطاقية السوداء من ورانا
مرة واحدة ويسألنا انتو بتعملو إيه هنااااااا ؟؟؟
كنت حاسة إننا بنصور فيلم أجنبي (رعب طبعا)
مش معقول كوميدي يعني .. بس هي قلبت كوميدي في الآخر
وضحكنا كتير .. بجد كان يوم حلو قوي .

...