جريمة وهمية
...
.jpg)
بقالي فترة كده كل يوم بعد ما أصلي الفجر
أقعد أسمع ماهر المعيقلي وهو بيصلي من مكة على إقرأ
أول إمبارح مكانش هو اللى بيصلي
فطفيت التلفزيون وعملت شاي بلبن
وإذا بصوت حفر غريب ومريب في سطح العمارة اللي جنبنا
واحد بيحفر بالراحة قوي بفاس وصوت أكياس والجو ده
والصوت بيروح ويرجع تاني
وطبعاً خيالي اللذيذ هيروح فين ؟؟
سبت الشاي وسبت كل حاجة وعشت الوهم وانتهينا على كده
متأكدة إن في واحد بيعمل جريمة فوق السطح وبيخبي حاجة
إتصلت بـ 122 وقلتلهم على اللى سمعته
وقلت هقفل من غير ما أقول بياناتي عشان مش طالبة حوارات على الفجرية
لقيته بيقولي منزل اللواء نبيل طاحون وبيقولي العنوان
قلت أهلاً … أنا كنت قايمة أصلي بس والله
أخد العنوان وقالي إتأكدي من رقم العمارة عشان هنجيب اتنين مباحث
من غير عربية نجدة عشان الصوت
شوية وماما قامت تصلي أنا وأختي بنحكيلها
قالتلي أنا كنت عارفة إني عندي واحدة عبيطة
قالتلي ده الفيلا اللى ورانا إتهدت والعامل ده بيشتغل من الساعة 4 الفجر
بصوت واطي عشان الجيران ميضايقوش وإنه كده كل يوم
الشرطة اتصلت تتأكد قلتله, قالي خلاص هنتلف المعلومة
قلتله والنبي لتتلفها
صباح الفل
…
1 comment:
طب عشان خاطري خدي بالك المره الجايه , بعدين ندخل في حكاية بلاغ كاذب و ازاعج للسلطات و البابا غنوج وبتاع و احنا مش فاضيين للكلام ده
Post a Comment