Tuesday, August 25, 2009

رمضاااان يجمعنا


رمضاااااان يجمعنا




أولاً كل سنة وأنتم طيبين
أنا عايزة أطمنكم أنا بخير معلش اتأخرت عليكم شويتين ثلاثة
هو الحقيقة الموضوع ده متأخر شوية وكان المفروض أكتبه
من أسبوع

أول مرة أعرف إن برامج شهر شعبان على قناة الحياه لذيذة كده وإنها عبارة عن إعلانات عن برامج ومسلسلات رمضان اللى هنسأل عليها مجرب من رمضان اللى فات ... معروفة ده

هي قناة الحياه حلوة وخفيفة وبرامجها لذيذة بس مش كده يعني , مش لازم الواحد يكره نفسه لما يفكر يشوفها
دلوقت إعلان عن مسلسل جديد وبعدين فاصل ... رمضااان يجمعنا وإسأل مجرب من رمضان اللى فات ,, وبعده إعلان عن مسلسل تاني وفاصل وإسأل مجرب شوية كده إعلان عن مسلسل خامس وفاصل وإسأل مجرب
وفي أجواء الإعلان عن مهرجان القاهرة للمسلسلات التليفزيونية والذي يقام في شهر رمضان من كل عام ييجي الإعلان المرعب بتاع لعبة زوما
إلحق بسرعة عدى ثانية ونص من غير إعلان وفاصل وإسأل ..

Deal or no deal
حوالي 70 مرة كده في اليوم عشان لازم نخليك تديل وتجرب وتبعت إن شاء الله نص رسالة وإسأل مجرب يمكن تكسب ربع مليوووون جنيه وانت قاعد في أوضة النوم وبتشرب قمر الدين سااااقع

يارب يارب يارب صبرني على بني آدم شو
والضحك الهيستيري الناتج عن ضرب شوية حلوين كده من كوكتيل المخدرات والتمثيل الخايب "ياريته تمثيل مقنع" اللي بيقوم بيه الجمهور وكأنه قال إيه فطسان من الضحك واللي يغيظ إنه يبص للكاميرا يشوف هي بتصور ضحكته المبهجة – اللى أكيد هتأثر على المشاهد وتبسطه – وطلته البهية ولا لأ
كل خميس وكنا بنعديها ,, لكن كل يوم وفي شهر كريم !!!
ده كتير ,, بس كتير ليه لو زعلان خير المحطة وانت الخسران وإسأل مجرب من رمضان اللى فات

رمضان وصل رمضان وصل حمدلله على السلامة
كله كوم ولوك بوجي وطمطم الجديد كوم تاني , تصدقوا بوجي رجع تاني مش عارفة إزاي
هو أنا مش ضد التطوير والاستمرارية اللى بتواكب العصر بس في حاجات لما بتخلص خلاص بتخلص ,, والناس لما بترحل محدش بيأخد مكانها مع الاعتذار لمؤدي شخصية بوجي الجديد ويمكن تكون أحلى من القديمة كمان وهي فعلاً شكلها قوية بس بجد أنا بتغاظ قوي لما نعمل تقليد أو تعديل لحاجة قديمة وذكرى جميلة كلنا عشنا واتربينا عليها , يعني كان ممكن نبتكر فكرة جديدة خالص أو يعني لو قافشة معاهم قوي بوجي وطمطم ممكن يعرضوا الأصلية على اعتبار إن أطفال اليومين دول أكيد أكيد أكيد ماشافوهاش ولا عاشوا معاها زيينا - إلا اللى جابها دي في دي زي ما عملت لعمر ابن أختي - وساعتها هيتبسط الكبير والصغير
بس بعيد عن كل ده الأغنية بتاعتها حلوة جداً
حبتها قوي وده اللينك اسمعوها معايا

http://www.youtube.com/watch?v=dVHKyY8PLBQ&feature=PlayList&p=EF7E9A0C335E58B3&playnext=1&playnext_from=PL&index=46

الموقف ده بيفكرني لما قعدنا 100 حلقة تقريباً نحب على حب عليّ وزهرة في ليالي الحلمية ونعيط على عياطهم وندعي في رمضان إنهم يتجوزوا بجد وبعدين اللهم اجعله خير إذ فجأةً تتحول آثار إلى إلهام , وانقل بسرعة وبرمج نفسك وظبط أحاسيسك كده وخليك حلو .. دلوقت ممدوح عبد العليم وإلهام شاهين أهو والله آخر إندماج ورومانسية ,, ومش عاجبك حوّووووول المحطة بس انت الخسران وإسـ أ ل ...

يللا إعلان وفاصل و ..... لما تلاقي نجوم السماء مليانة إيمااااان ,, وما تلاقي الخير والحب في كل مكااااان .....
خسارة أنا كنت بحب الأغنية ده قوي من رمضان اللى فات واسألوني أنا , ونزلتها على الكمبيوتر بس خسارة مبقتش طايقة الطبلة اللى فيها .

وأخيراً شكلي هأتهور .. في زرار أحمر في الريموت ممكن منه أدلت القنوات أنا مش بحب أستعمله خالص حتى لما بحب ألغي قناه بحطها في الآخر وخلاص ,, بس شكلي كده هدوووووس عليه

وكل سنة وأنتم طيبين ,, إعلان وفاصل ..... رمضان يجمعنا .... مسلسلاتك عندنا ...... لما تلاقي ..... إيمااااان ... و ...... الخير والحب والصبببببر في كل مكان ..... هلال ...... طفشان ..... يبقى أكيد رمضان وصل .. رمضان وصل ... رمضاااان تن تن رمضاااان تن تن

أختكم طماطم